閒蕩巴塞（上）
舟車勞頓，粗眉仔和豬豬都有點攰，決定先逛哥德區。
粗眉仔旅遊小百科：哥德區
哥德區（西班牙語：El Gòtic 或 Barri Gòtic）是巴塞隆拿老城的中心，東至西的範圍由蘭布拉大道（西班牙語：La Rambla）延伸到萊埃塔納大道（西班牙語：Via Laietana），南至北則從地中海海濱延伸到聖佩雷圓環（西班牙語：Ronda de Sant Pere）。
哥德區的街道錯綜複雜，有許多特色小街和廣場。
這區大部分地方都不准車輛進入，但的士例外，適合步行參觀。
未幾，兩人便行到一片空地，這片空地叫國王廣場（西班牙語：Plaça del Rei），廣場四周都被磚牆包圍，充滿壓迫感。
話明係「國王廣場」，周邊的建築物自然同皇室有關，全是好幾百年的古蹟。
當中最宏偉的是巴塞隆拿城市歷史博物館（西班牙語：Museu d'Història de la Ciutat de Barcelona），一座由從前皇宮改建而成的哥德式建築物。
博物館左側有座哥德式塔樓，是俯瞰巴塞隆拿舊城區的好地方，可惜今日天色麻麻，兩人決定之後有機會才去。
大王宮（西班牙語：Palau Reial Major）是巴塞隆拿伯爵和其後阿拉貢國王的住所，非常有歷史價值，有的部份甚至可以追溯到古羅馬時代。由於屢經戰亂，目前所見大部份建築都建於15到16世紀，已經不是初建時的結構了。
大皇宮裏面是博物館，而且還有觀景台，兩人才剛抵埗，都想在戶外走走，最終沒有進去。
巴塞隆拿的建築物古雅而且有特色，就算在街上閒逛都已經處處驚喜。
例如在國王廣場附近，就有一座建於16世紀文藝復興時的建築物，叫「Museu Frederic Marès」。
如果單純欣賞建築物本身，不用繳付任何費用，但倘若要參觀裏面的博物館就要買票了。
來到巴塞隆拿，無論如何都要食海鮮，剛好這裏附近有一間網友推介的餐廳，便入去試試。
餐廳的佈置十分簡潔，而且環境舒適，令人放鬆。
粗眉仔點了一個八爪魚沙律，但味道普通，而且份量少，不大化算。
鍋仔紅蝦賣相一流，而且蝦香滿屋，未食已經流晒口水。
蝦肉味道鮮濃，即使吞落肚後，口腔內餘韻久久不退，令人回味無窮。
海鮮飯又鹹又鮮， 十分好吃，雖然只是一人份量，但就算兩個人分都夠食。
可惜食到鑊底時有股焦臭味，整個海鮮飯立即大為失色，粗眉仔有點失望。
Santa Tapa Barcelona
地址：Carrer de la Freneria, 5, 08002 Barcelona, 西班牙
電話：+34 937 50 35 10
網站：santatapabarcelona.com
今餐不算太貴，但食物質素並沒有預期中好，粗眉仔不大推介。
